Pust Puste, Puste! Kriv si, kriv: Ča je Rijeka od Varaždina zgubila i tri boda Dinamu poklonila. Kriv si ča san ovo leto jedinicu z Matematike dobil i mat jako razjadil. Kriv si ča san jutro na levu nogu stal i z Lovroton se potukal. Kriv si ča j’ moja sestra mobitel zgubila i va kuće ludnicu storila. Kriv je ča je nona pala i kuk zlomila pa celo leto va posteje bila. Puste, Puste! TI si kriv za se! I zato ćeš platit i z ovega sveta partit!
- mjesto (razredna nastava)
Lukas Slosar, 3. razred
OŠ Srdoči, Rijeka
Mentorica: Gordana Vukić
Karneval Karneval, karneval… Ko da je ljude prinesal val! Bundeve i kauni, Morčići i zmaji… Karneval, karneval… Ča se Pusta pali Ili ga se žali Za so zlo ko storil je on, A nikad ni rekal ni „pardon“. Karneval, karneval, Kad bi baren bil saki dan!
- mjesto (razredna nastava)
Lada Jadro, 4. razred
OŠ Srdoči, Rijeka
Mentorica: Nensi Čargonja Košuta
U konobi moga nonota U konobi nonota moga, sve vonja na stara vrimena, tu se čuva vino, tu je jubav skrivena. Na zidu visi stara mriža, baril vonja na vino mlado, bocun vina, žmul vode, u konobi svima drago! A kad vino gre niz grlo, zapiva nono onu našu, i staro i mlado u jedan glas, čuvajte dico zemju našu. Vidiš dite, reče mi utiho, čuvaj kamen, lozu, draču, svugdi je lipo, ali najlipše je na Braču! A onda je zaspa nono moj, sad ga više ni, samo tišina u konobi, njegova duša spi.
- mjesto (razredna nastava)
Ema Žuljević, 4. razred
OŠ Bol, Bol, Brač
Mentorica: Anđela Buvinić
Moj otok More. Modri vali i stine. Juja se, piva i uživa. Radost, srića i jubav. Moj Pag.
- mjesto (razredna nastava)
Ivan Brdar, 1. razred
OŠ Julija Klovića, Zagreb
Mentorica: Alka Mirna Ančić Igrec
Moj grad Šibenik moj, cili od ćakule. Stoji, muči i čeka mene da dojdem na lito. Sritna sam. Moj grad!
Pohvaljeni rad (razredna nastava)
Zoja Šupe, 1. razred
OŠ Julija Klovića, Zagreb
Mentorica: Alka Mirna Ančić Igrec
Užance su prastare Dica, judi, mladi, stari, svi veseli, svi se radujedu, cili dan ludujedu. Jer maškare užance su stare, prastare, sviman nan drage. Sad kad vrimena su modernija došla maškare nas sićaju na vrimena prošla.
Pohvaljeni rad (razredna nastava)
Ivana Kaselj, 2. razred
OŠ Bijaći, Kaštel Novi
Mentorica: Ivana Lukas Bartulović
Krnje Velik, grub, dikod i lip, glavat, nogat, rukat, šporak, smrdljiv, štuf ili nasmijan. Jol se jidi jol se ceri, svaki put drukčiji, ma uvik kriv. Svi čekadu da ga zapalidu da plati za grije svoje ali i njiove pa da maškare krenu na maskenbal.
Pohvaljeni rad (razredna nastava)
Bruno Pajdek, 2. razred
OŠ Bijaći, Kaštel Novi
Mentorica: Ivana Lukas Bartulović
Maškare Lipo oli grubo, ča se smije oli plače, ča me plaši ol veseli, svako lice, svaka faca drago mi je. Jer maškare oduvik nas nasmijajedu i svakoga zafrkajedu. Drage naše maškare!
Pohvaljeni rad (razredna nastava)
Borna Žanić, 2. razred
OŠ Bijaći, Kaštel Novi
Mentorica: Ivana Lukas Bartulović
Halubajski zvončari
Halubajski zvončari su naša zvončarska skupina s područja Kastavštine, uvrštena na UNESCO -vu listu nematerijalne kulturne baštine sveta. Imaju oko 300 člani i z njimi su i „Mići zvončari“, ki predstavljaju podmladak Halubajskeh zvončari. Zvončar ne more saki bit nego moraš imet halubajski koreni po obiteljskoj tradicije ako ti je otac zvončar onda more zvončar bit i sin. Današnja odora Halubajskega zvončara nosi svoju simboliku. Mladići z Kastavštine služili su vojsku va mornarice i zato oni nose mornarsku majicu. Ona je bila dokaz da su odslužili vojsku. Preko majice ogrnu ovčji kožuh i vežu crveni facol oko vrata. Simbolično nose bele brageši s crvenun crtun sa strane aš je bela boja simbol čistoće. Na nogi obuju črne škornji. Oko pasa imaju velo zvono. Na glave njin je vavek vela rogata maska s crvenen, isplaženen zajikon. Va rukah nose ukrašenu batinu – baltu. Sako leto, ne mareć za zimu, daž i sneg obilaze svoj kraj pa skaču i zvone. Veseli su i glasni, pa se ih zbog tega i malo bojin. Ma ipak za se ča su strašni oni nan po tradicije tiraju zimu i dozivaju proleće i si ih mi rado gjedamo. Jako san ponosna na naše pusne užanci.
Pohvaljeni rad (razredna nastava) Sofia Franjić, 2. razred OŠ Rikard Katalinić Jeretov, Opatija Mentorica: Gordana Jedriško Popeškić
Pegla
Na šufitu moje babe našla san starinsku peglu. Nagovorila san babu da mi pokaže kako se koristi. Objasnila mi je da va prošlosti ni bilo struje pa se je va peglu stavljal žar. Stavile smo ga nutra i onda san ja jedno dve ure peglala – po starinski!
Pohvaljeni rad (razredna nastava) Zara Ružić, 2. razred OŠ Srdoči, Rijeka Mentorica: Petra Lukežić
Na šufitu
Ča je na šufitu moje babe?
Pitala san svoju babu ča je na šufitu. Ona je rekla: Odi pa vidi! Pa san šla! Videla san drvene igračke i jednu staru drvenu škatulu va koj je bila slika moje mame i tate.
Jako san se naveselila da su mi suze došle na oči.
Pohvaljeni rad (razredna nastava) Lora Vujnović, 2. razred OŠ Srdoči, Rijeka Mentorica: Petra Lukežić
Lipi gušti i užance
Ča ti je boje od Splita lipi moj,
ovi naš šušur, more i svaki škoj.
Na Matejušci svak svoj bocun drži
i briškula se prži.
Malo zabrontuladu, al to in je teška besida i razbibriga.
Sunce, more, riva,
tot van lipi moji najlipja arija biva.
Na crkvi Svetega Duje ura podne zvoni,
uru fetivima za obid broji.
Sudamiji se dica najviše veselidu
vunu o’ cukra i ticu klapalicu svin srcen želidu.
Kad u nas okrene bura,
kroz kalete vije, tuče u porat,
brode tresije.
Na Badnjak cila kala vonja.
Na kominu, u bronzinu bakalar, kumpir i maslinovo uje se kuhaju,
u teći na špaheru fritule se frigaju.
Lipi gušti i užance i čoviku i beštiji na justa smih izmamidu.
Pohvaljeni rad (razredna nastava) Aldo Juranić, 2. razred OŠ Žnjan – Pazdigrad, Split Mentorica: Ana Domazet
Rički karneval
Ne Ričkomu karnevalu si su veseli!
Si skaču, tancaju i kantaju:
Ni bitno si l’ morčić, klaun, al’ zvončar
Aš ta dan zabavja se i mlad i star.
I po celon se gradu smiju veli judi i dica mića
Aš bit na Ričkon karnevalu neopisiva je srića!
Pohvaljeni rad (razredna nastava) Mia Šulić, 4. razred OŠ Srdoči, Rijeka Mentorica: Ana Baretić
Miljeti moje babe
Ča furešti svit zna ča je činila moja baba kad ni činila ništa. Plela je miljete.
Plela je u slobodno vrime kad bi završila s kuvanjen, šumprešavanjen i pranjen. Plela je skoro svaku večer u miru pored toplega špakera kad bi cila fameja išla leć. Jemala je moja baba dvi-tri kukice i punu konistru konca. Jemala je puno mustri svake vrsti. Ni moja baba plela samo miljete vengo i kuverte – velike kuverte ča bi pokrile posteju s kraja na kraj, s vrja do podanka. Govorila je meni baba da je u njeno vrime kuća bila krcata miljetima. Bilo ih je deboto svudir – na televiziji, ispod televizije, na stolu, na ventrini, ma di ti god može past na pamet. Niki su bili puno važni pa su stali u ormaru oprani i šumprešani, niko ji ni smija ni taknit da ji ne išporka. Plela ji je za moju mater, za me, za moju sestru i ko zna za čiju još dotu. Moja baba je sritna i zadovoljna zato ča je puno tega naplela i ča će nan puno ostavit.
Krasit će babini miljeti puno kuć. I znate ča ću van za kraj reć – naučila je baba i mene plest.
-
mjesto (predmetna nastava)
Ema Dudan, 5. razred OŠ kneza Trpimira, Kaštel Gomilica Mentorica: Jelena Klarić
U konobi moga dide
U konobi moga dide vonja po starin, prošlin, zaboravjenin vrimeniman. Uvik kad u nju ulizen, ćutin staro drvo, vonj vina i uja.
Konoba moga dide je mala, škura, s kamenin zidovin koje je uvatija zub vrimena. U jednon kantunu stoji stara bačva puna vina. U drugon kantunu konobe su botije uja, rakije, prošeka, kvasine i nike prazne bačve jerbo i’ već dugo nikor ni koristija. Dide svakega godišća pravi svoje vino i to onako kako su ga pravili njegov ćale i njegov dide. U vrime jematve konoba oživi. Cila fameja bere grožđe pa ga u vrićan nosimo u konobu. Dide ga melje i priliva u bigunac. Čele i ose vrtidu se na sve strane. Po konobi, dvoru i ciloj ariji širi se lipjivi vonj masta. Dide ga posli deset dan prilije u čistu bačvu koja se danima natakala u dvoru. U didovoj konobi na zidu visi stari srp i par stari alata. Dide mi uvik kažije čemu ča služi, ma ja to uvik zaboravin.
Jedino ča znan je da je konoba srce svake kuće, misto di se sprema sve ča je važno, od spize do uspomena.
-
mjesto (predmetna nastava)
Toma Saratlija, 6. razred OŠ kneza Trpimira, Kaštel Gomilica Mentorica: Tamara Smokrović
Moja pranona mlikarica
Moja pranona,
dok je mlada bila,
prije sunca se j stala,
i va štalu s feralon šla.
Kroz Hrastenicu j prošla,
s feralon v rukah,
put joj do Rike svitel.
Na putu nazad,
bila j trudna,
ali jako zadovojna
aš j neč zaradila.
Svoju i tuju famliju j nahranila.
-
mjesto (predmetna nastava)
Tara Kovačić, 8. razred OŠ Čavle, Čavle Mentorica: Dolores Maršanić
Va nonine padele
Zima gre, Božić zove,
ma šparhet je prazan, a va kuće zima.
Ni već one dobre orehnjače
ka smeh moje none ima.
Ne kuha se maneštra, ni dinstani kapuz,
va velu padelu stane samo šaka suz.
Ni ni brodeta, ki još diši na more,
ni za štrudel više na stole nisu kore.
Zad kuće same stoje
za uje masline nepobrane.
Nonini koraki sad po Nebe zvone,
ma saki je taj dih i daje tu, va mane.
-
mjesto (predmetna nastava)
Sonja Buga Papeš, 8. razred OŠ Vladimir Gortan, Rijeka Mentorica: Ljiljana Jurman
Na kominu moga dide
Vanka je stigla prava zima. Kako nima skule jerbo su praznici, reka san materi da gren ko dide. Uvik ka san s didon, pripovida mi kako je bilo ka je on bija dite ka ja sad. Volin slušat didove štorije i jist didovu domaću spizu.
Sidimo za kominon, a dide sprema pole. Opra je kunpir, prikrižija ga na po i stavija mrvu soli. Najslaje su mi pole kad i’ dide zasoli i ispeče u lugu. Za obid volin ka dide kuva koštradinu i kupus u bronzinu. Il’ ka mi izriže pancete i izvadi bokun sira iz uja. Posli obida vajalo bi se i zasladit. Priča mi je dide kako u njegovo vrime ni bilo čikolate pa su dica jila kruva, masti i cukra da bi se malo zasladila. Dok je baba Mara bila na nogan, užala je peć kruv ispo’ peke. Onda bi rekla da umočimo kruv u uje i da je to likarija.
A ča ja znan… Meni je jope kunpir na kominu od svega nikako najboji.
Pohvaljeni rad (predmetna nastava) Ivan Jurić, 5. razred OŠ Bijaći, Kaštel Novi Mentorica: Tamara Smokrović
Pranonotova stina
Na kraju sela
kraj puta starega
stoji ta stina –
oku i srcu milina.
Lipotica od kamena
od pantivika tamo je stavjena.
Pranono je govori:
Tot san ja čeka,
tot san ja sluša
jude od vika.
Na njon se počivalo i sedilo,
o trudima, o moru, o zemji…
o svačen zborilo.
Tot su se riči
ka zlato čuvale,
tot su se suze
u smihu združivale.
Resla su i dica
uz stinu tu
igrala se, skakala, padala
i doživila sriću svu!
Danas je pusta
i sama stoji,
ma ko da je čujen…
Moj ponos,
pranonotova stina!
Pohvaljeni rad (predmetna nastava) Ana Mišetić, 5. razred OŠ Selca, Selca Mentorica: Silvija Buvinić
Užance moga mista
Novogodišnje kolo
za početak godišća…
U Selcima se bala, nazdravja i
“Na dobro van mlado lito dojde” piva.
Pa krnovaj…
Žene pravidu makarune,
mularija po kućan gre maškarana.
Uvečer je tastamenat
sa kojin i ne bude
svak kuntenat!
I Cvitnica za čas dojde.
Judi gredu na misu i
nosidu na blagoslov
masline grančicu.
Onda gre Vela šetemana i
u crikvi muka pivana.
A vrhunac je
soldata padanje i
uskrslen Isukrstu klanjanje.
Fešta nad feštan
svih Selčanih
Gospa je od Karmena.
Ma na kojen dilu svita bili
za Gospu bi svi
uvik doma dolazili.
Puno misto svita
druženje, inkortavanje
procesijun, zogatule
muzika i balanje…
Svi sveti brzo projdu
jerbo je svak u priši,
vaja masline pobrat i
uje učinit.
A na kraju godišća
pali se badnjak i
čeka se porojenje Ditića.
Godišća pasaju
generacije se izminiju,
ali se selaške užance
sa kolina na kolino
ka svetinja štuju!
Pohvaljeni rad (predmetna nastava) Emili Trutanić, 5. razred OŠ Selca, Selca Mentorica: Silvija Buvinić
Moje izgubljeno blago
Kakovo je vrime došlo
Sve se pritumbalo.
Moje lipe čakavice,
Odjednon je nestalo.
Misto starih, lipih riči
Sad se svaka čuda čuju.
Dica više govorit ne znadu,
Besidu našu lipu gubu.
Blago naše triba čuvat
I čakavicu probudit.
Dok je nade i života,
Ona će navik bit naša lipota.
Rječnik:
Pritumbalo – pomiješalo
Besida – riječ, govor
Pohvaljeni rad (predmetna nastava) Roko Mlačić, 6. razred OŠ Bijaći, Kaštel Novi Mentorica: Marina Veić
Da se užanca ne zatare
Grobnički dondolaši su udruga ka promiče pozabjene običaje. Počeli su kanpanat 2000. leta. Ovo leto slave 25 let očuvanja tradicije i dondolat će se na velo i široko. I ja san mići dondolaš.
Grobnički dondolaš na glavi nosi krabuju. Toj skuhana i osušena glava, kostur goveda, brava, krave ili boškarina. Prvo leh se skuha glavu, goveda se zakapa va zemlju da nestane čim više mesa. Ča ostane, makne se z kuhanjin. Rogi se namontiraju na parićan kostur i gjeda se da budu čin veći. Rada zamu rogi od boškarina. Dondolaš ima črno-črjenu kariranu stomanju. V ruki nosi žuntu, na hrbatu kožu, belo ili črno krzno od ofce fermano z špagi da čvrsto stoji na telu. Koža pokriva celi hrbat i ramena se do kolena. Njegove brageše su črne, preko njih navuče vunene kopice i debeli starinski postoli.
Dondolaši pohajaju va paru, aš va životu moraš imet prijatela na kega se moreš oslonit. Obahajaju sela po Grobinšćini za vrime maškar. Staju po štacijah da pozdrave domaćina i otiraju zimu. Pred kućun domaćina tancaju kolo, a za uzvrat domaćin časti hranun i pićen kako bi in olakšali daljnje obahajanje.
Grobnički dondolaši rado su viđeni gosti na međunarodnin i domaćin povorkami. Poznati su po svom humanitaronon radu. Sako leto tiskaju veli broj kalendarih, a ono ča zarade, poklanjaju. Ovo leto na kalendaru su mići dondolaši ki promiču starinske igre. Današnja dičina ne znaju za te igre aš je vrime od interneta i mobitelih.
Naša užanca dondolanja je naša kultura, del našega živjenja. Ne moren zamislit leto bez obahajanja sela i dondolanja. Bit dondolaš je ponos, radost sakog grobničkog čovika.
Po staroj navadi, neka se praši,
čujte judi, gredu dondolaši!
(iz himne Grobnički dondolaši, Anđelko Grlaš)
Pohvaljeni rad (predmetna nastava) Mateo Maričević, 6. razred OŠ Čavle, Čavle Mentorica: Dolores Maršanić
Da se na pozabi ča i kako su delali naši stari
Pred čuda let judi nisu delali va firmah, leh su delali va poju, šumi i po njivah. Imeli si blago i od tega su živeli. Mučili su se da bi vele familije othranili. Imeli su puno dice i trebalo ih j zgojit. Va poju su kosili, delali stogi i lovnice. Čuvali su seno da bi po zimi imeli dat ča blagu za jist. Sadili su konpir, fažol, hrmentu. Hrmentu su nosli va mlin zmlet da bi mogli kuhat palentu i kašu. Kaša i mliko j bila glavna hrana. Divojke su noslile rucak i pune late mlika pa bi šle hodeć v Riku prodat i tako bi zaradile ki šolad. Judi su imeli prasci, a skoro saka familija je imela kokoše. Niki su imeli konji pa su šli va šumu po drva. Va ono vrime nisu imeli motorke, leh su se ručno delali. Puno, jako se puno delalo.
Se va semu, s kosun sej kosilo, z grabjami grabilo, sikira sej brusila da bi boje delala, pilaj pilila, a motika kopala. Danas j tega se manje. Remo va butigu, kupimo ča rabi i to j to od dela. Se j boje i lipje bilo. Moji stari povedaju da su judi bili sritni i dobre voje. E, da, bila su to lipa vremena!
Pohvaljeni rad (predmetna nastava) Dorijan Milčić, 6. razred OŠ Čavle, Čavle Mentorica: Dolores Maršanić
Pisma zemji mojoj
U momen srcu
Sunce za nju
Grije.
U njojzi je
Rvat sa tri pisma
Pisa.
Za nju je Rvat
Suze lija
I krv gubija.
U njojzi je Rvat
Bašćansku ploču
U kamenu pisa.
U njojzi je Marko Marulić
Slavnu Juditu
U libru napisa.
Za nju se borilo
I živote
Davalo.
U njoj resten i ja
U jubavi i
Srići.
Neka Bog
Čuva nju i
Njene virne jude!
Pohvaljeni rad (predmetna nastava) Mia Brahović, 6. razred OŠ Jesenice, Dugi Rat Mentorica: Renata Kovačić
Šufit moje none
Zima je.
Dohaja vrime od Božića.
Va šufit rabi poć.
Spušćaju se škale.
Otpira se kotorata.
Vetar šviće.
Diši po drvu i starini.
Sedin na podu, srce mi tuče.
Ča od straha, ča od čuda.
Se je tu kako spada, lipo i rashitano.
Sega je nutra: bocuni, valiže,
boćice za bor, ovčice i Isusić za pod bor,
veltrina, makina Singerica.
Pauki koliko god ćeš.
Ma ne bojin se, to su naši domaći!
Hitin oko na levu stranu, vidin piše Burda.
Ča je pak to? Piše 1978.!
Lipe ženske, lipe halje i brageše, modni hit.
I jedna mića škatula. Ki zna ča je va njoj?
More bit da je i ona stara pedeset let.
Još bin rada na šufitu bila,
ma nona zija: Mala, ča čekaš, donesi boćice!
Pohvaljeni rad (predmetna nastava) Petra Cuculić, 6. razred OŠ Vladimir Gortan, Rijeka Mentorica: Ljiljana Jurman
Ča su jili naši stari
Da ki pozna Grobničana
ki palentu krompiricu ne voli?
Ja ne.
Greš va Martinovo Selo
va stari malin
pa jedva čekaš da doma dojdeš.
Kad je kuhaš, cela kuća diši,
kad je gotova, sa se poji.
Palenta i sir,
ribica i palenta,
palenta i broskva,
se je to za prsti polizat.
Nadamo se
da to domaće jido
nikad neće nestat.
Pohvaljeni rad (predmetna nastava) Nea Matić, 6. razred OŠ Vladimir Gortan, Rijeka Mentorica: Ljiljana Jurman
Na šufitu
Na šufitu vrime ka da je stalo.
Kandele do po izgorile
spomen na vrime prez letrike.
U fojin zaudobjene ricete
o’ njoki i pašticadi,
pršurati i rafijoli.
Davno pročitane kartuline o’ svojte i’ svita
natopjene suzan i znojen
pisane žujavin rukan
ča su mladost ostavile.
Ča sve krijedu šufiti naši’ stari’ kuć?
Tragove i vonj prošlosti
povist našeg roda…
Pohvaljeni rad (predmetna nastava) Siniša Botica, 8.razred OŠ Bijaći, Kaštel Novi Mentorica: Tamara Smokrović
Grobnički haiku
none s latami
jutro, noć, sunce, daž
trpljenje, život
Pohvaljeni rad (predmetna nastava) Magdalena Fućak, 8. razred OŠ Čavle, Čavle Mentorica: Dolores Maršanić
Mlikarice
Oprćene, pogrbjene,
saki dan nahodeć su šle.
I po dažju i nevrimenu,
i dok je vrelo sunce sjalo.
Žalet se nisu mogle,
aš to delo
niki osim njih
delat ni mogal.
Zato ih se ne smi pozabit,
vredne i brižne ženske !
Pohvaljeni rad (predmetna nastava) Lucija Milinović, 8. razred OŠ Čavle, Čavle Mentorica: Dolores Maršanić
Stare užance Gromnišćine
Mi va našen kraju imamo sakakovih običajih i događajih. Si znaju čaj Mihoja, palenta kumpirica, grobnički dondolaši, Bartoja, Petrova, Martinja, paljenje pusta…
Meni najdraži j Petrova ku slavimo 29.6. Na taj dan pobiramo šmrikvu po šumi ku večer zapalimo i preskačemo oganj da projdu se nedaće i zlo.
Od vavik je na Gromnišćini bilo tišjara, kovača, postolara, čobana, šilic, mlinara.
Si oni su delali, namučili se aš butig ni bilo, a moralo se živet. Ni bilo puno soldih, judi su pomagali jedan drugome i dobri su bili.
Ono po čemu su Gromničani poznati je i naš domaći kanat. Si vole čut Ala, homo ča popit, Rojeni san Grobničan, Kad ja obajden svoju Grobnišćinu…To su se domaće pjesme aš su naši judi odvavik voleli kantat, veselit se i uživat. Va mojen kraju judi odvavik sopu i bajsaju.
Na našen Grobničkon poju još vavik saki dan pasu krave od barbe od moje mame. Ki put mu i ja dan ruku okol blaga. Od njega san naučil kako se zvono dela, kako kravu otelit i konja jahat.
Domislin se i štorije o mlikarici kaj neboga nahodeć zgobjena na škini nosila latice z mlikon gospodi v Riku.
Gromničani su dobri i pošteni judi i odvavik su bili veli delavci, voleli su tradiciju, običaje, a najviše svoju besedu. Neka živi naš ČA!
Pohvaljeni rad (predmetna nastava) Jakov Rak, 8. razred OŠ Čavle, Čavle Mentorica: Dolores Maršanić
Zemja dide mog
Kad bi dida zaronija ruke u zemju, činilo mi se
ka da dira život.
Onako, polako, s poštovanjen.
Nikad u sili, nikad u žurbi.
Ka da zna da zemja pamti ruke šta je miluju.
„Vidi, un,” reka bi mi, dok bi prston greba po ispucalon zemji,
„ova je zemja starija od nas i ostat će posli nas.
Al kad čovik voli svoju zemju, ona mu vraća.
Ne samo plodon, nego i korenon – da znaš di pripadaš,
da ne lutaš ka list na vitru.“
Nisan tada razumi,
meni je svit bija velik, prevelik za stat na jednu njivu.
Gleda san dalje, sanja dalje, jer san mislija
da se srića skriva negdi di je zemja tuđa,
di ruke ne vonjaju na maslinovo ulje,
di se jutra ne bude uz miris soli i bure.
A dida je samo šutija i smija se ,
s onin blagin smihon čovika ča zna.
„Neka, un, svako triba poć da bi zna vratit se.”
I otiša san.
I vidija san puno,
al nigdi nisan naša ono ča san izgubija.
Samo san jednon, u tuđen gradu,
čuja nekog starca kako reče „ča”
i ka da mi je cila duša poskočila.
Ka da je tilo znalo ono ča je pamet zaboravila:
da san bez svog korena samo gost na tuđin putima.
Sad kad se vratin, kad stopalo opet dotakne
tvrdu zemju,
kad prstima prođen kroz prašinu vinograda,
u koji je dida sidija lozu,
ositin – tu je.
Tu je sve ono šta san mislija da san zgubija.
I dida, i njegove riči, i pisme
ča su se pivale u konobi,
i miris kruva šta ga je nona pekla,
i sol u zraku šta grize lice,
i kamen ča grije podne kad sunce upeče.
Ništa nije nestalo, ništa nije prošlo;
ostale su sjene
i tišina koja odjekuje
u svakon koraku, u svakon dahu.
Zemja sve panti.
A ja san se vratija
u zemju dide mog.
Sad ni dide,
al kad dođen na istu njivu,
zatvorin oči i opet čujen
njegov glas u šuštanju masline,
u cvrčku ča ne umire,
u vitru ča nosi miris loze.
Ovo ni samo zemja.
Ovo je didov trud,
njegova jubav,
njegov hod zabilježen na ciloj njivi,
njegove riči zapisane u svakon kamenu.
U ton kamenu ositin njegov glas,
ka da mi šapće: „Evo, un, sad znaš.“
Kad dirnen svaki dil,
koji je bija u dotik s njin,
ositin,
ka da mu doticajen stare uspomene.
I dok god odan po njoj,
dok god je diran rukon,
i on je ovde,
u zemji dide mog.
-
mjesto (srednja škola)
Jakše Veić, 1. razred
-
gimnazija Split, Split
Mentorica: Vesna Krželj Velić
Frmaj
Frmaj, aš ne moraš ne jušto sakega kuntentat.
Frmaj, aš ne moreš nanke ti se rivat, ćeš se rovinat!
Frmaj, će ti bit žal pole bit.
Će ti žal bit ča z svojun dicu nisi već vrimena bi
i z ženun pred večer va teploj kući vino pi.
Ča svita vidi nisi, magari vajk povidaš kako ti je najlipše tuka.
Jušto tuka, na toj zemlji po kojoj si od kad znaš za se reguliva i ruka!
Ćeš se benj opeć čovik moj!
Ćeš benj osurit i počet zabljivat
I onda, kada kasno bude,
ćeš utit počet, ono ča još jedino sada moreš gambijivat!
-
mjesto (srednja škola)
Leonarda Lanča, 2. razred Pazinski kolegij – klasična gimnazija s pravom javnosti, Pazin Mentorica: Sanja Depikolozvane
Fešta u Grotama
U Dalmaciji su uvik fešte
Tako i mome mistu, Grotama
Vela je fešta o’ Vele Gospe
I procesjun kroz kalete stare
Svit se skupi, batude baca
Živo je uvik na Trgu Mudraca
Prid staru peškariju užgu se gradele
Na gomilu donesu bocuni vina
Groćani su široke duše
Peču se sardele i skuše
Cila je pjaceta vonjala
A nikor bi i zabala
Učine se šušur u po’ ure
Zapivaju klape podan balature
A ka’ se sunce u more smoči
Gleda se ko boje priko ognja skoči
I furešta ni falilo svita
Ča bi pasali iz Splita
Na rivu bi akoštala Porozina
Dočekala brujet iz bronzina
Do jutra se pivalo i feštalo
Nike bi mrvu i smantalo
A onda bi se čulo odizad škura:
Pojte doma svitu, kasna je ura
-
mjesto (srednja škola)
Tonći Cecić, 4. razred Tehnička škola strojarstvo i mehatroniku, Split Mentor: Nađan Dumanić
Va store konobe
Va store konobe moga noneta
saku se večer kantalo,
ćakulalo i na horti igralo.
Uz fetu pršuta i freškega kruha
nono je šćorice gono i seh nasmijo.
Ljudi su pridevali,
bilo je mesta za seh,
a preši za doma svojni ni bilo.
Rječnik
store – staroj; saku – svaku; kantalo – pjevalo; ćakulalo – čavrljalo, horti – karte; freškega – svježeg; šćorice – pošalice, pričice; gono – pripovijedao; seh – sve; pridevali – dolazili; preši – žurbe; svojni – nikad
Pohvaljeni rad (srednja škola) Katarina Načinović, 3. razred Pazinski kolegij – klasična gimnazija s pravom javnosti, Pazin Mentorica: Orijana Paus